منذ أيام قليلة بدأ العام الدراسي الجديد، وبدأت معه المشاكل التي تؤرق الطلاب وأولياء امورهم، إما بسبب ارتفاع تكاليف الدراسة من دروس خصوصية أو أزياء وأدوات الدراسة أو متاعب المواصلات من والي المدارس والجامعات.

وهذه كلها مشاكل معتادة الفها الجميع واعتاد عليها الاهالي، إلا أن الجديد تجده دائما في مدارس الاقاليم البعيدة عن الاهتمام الحكومي بحكم موقعها الجغرافي البعيد عن العاصمة حيث مقار الوزارات ودواوينها.

وفي هذا العام شهدت مدارس كفر الشيخ مشكلة متكررة، حيث شكا الطلاب واولياء الامور من الكثافة الطلابية في الفصول، مما يؤثر بالسلب علي عدم تركيز الطلاب وانتباههم أثناء شرح الحصص.

يقول المهندس اسماعيل كامل، ولي امر: "شئ مؤسف اما تدخل الفصل وتلاقي اربعة أو خمس طلاب في دكه واحده، الطالب ازاي هيركز في الدرس أو يفهمه، أو المدرس نفسه هيتابع الطلبه دية ازاي.. وهيقيم كل طالب علي أساس ايه.. دا لو قال لكل طالب كلمه الحصة هتخلص ومش هيشرح الحصة أصلا.. وبالتالي الطلاب هيكونوا في حالة تشتت وعدم انتباه بسبب زحمة الطلاب في الفصل".

ويقول محمد فكري، ولي امر، انه "من كتر زحمة الفصول في المدرسة بعض المدارس بتعمل فصل طاير.. والمدرس بيشرح للطلبة في ملعب المدرسة"، متسائلا "الي متي يظل هذا الوضع واولادنا يعانون من زيادة عدد الطلاب في الفصل".

ويقول الحاج السيد علي، ولي امر، ان "الأولاد كل يوم بيجوا يشتكوا من بعض علشان اللي يلحق مقعد يجلس عليه.. وطول اليوم بيقعدوا يتعركوا مع بعض علشان كل واحد يلاقي مقعد يجلس عليه.. وفي النهاية مفيش تحصيل ومفيش تركيز اثناء شرح المدرسين.. والاولاد بيروحوا المدرسة حاجة روتينية وخلاص.. رغم انه توجد حلول كثيرة للمشكلة لكن المسئولين يتعنتون.. والي الله المشتكي".