يعاني اهالي قرية البشيقة الغربية، التابعة لمركز الحامول بمحافظة كفرالشيخ، من عدم وجود أي مصالح حكومية بالقرية التي يقطنها عدة آلاف من المواطنين بينهم نسبة كبيرة من الطلبة والتلاميذ والموظفين والمرضى وغيرهم ممن هم في حاجة الى التنقل الى المدينة او القرى المجاورة للالتحاق بأعمالهم او الدراسة او التوجه الى المستشفى او الوحدة الصحية او قضاء حوائجهم اليومية، الا ان ذلك على ما يبدو اصبح حلما بعيد المنال في ظل سوء حالة الطرق وعدم وجود وسيلة مواصلات ادمية، الى جانب اهمال المسئولين وعدم تجاوبهم مع عشرات الشكاوى التي تقدم بها اهالي القرية.

يقول محمد حسن لـ"آخر الانباء": "تعبنا من مخاطبة المسئولين وليس امامنا الان سوى توجيه نداء الي الرئيس عبد الفتاح السيسي.. احنا طول عمرنا بنعاني من الطرق، للاسف الطرق من غير رصف ومفيش وسيلة مواصلات غير عربيات الربع نقل".

ويواصل حديثه: "لما يكون فيه مطر مفيش حد يقدر يطلع من بيته، حرام والله.. بنمشي علي رجلينا كل يوم 10 كيلو في الطينة، لو واحد تعبان ممكن يموت، بل فيه ناس كتير ماتت بسبب الطريق، عايزين الطريق يترصف، مش كفاية مفيش مدرسة، ولا مستشفي، طيب نعمل ايه، مش احنا بشر بردو ولا عشان احنا غلابة يعني"؟.

ولما سألناه هل تقدمت بشكوى او طلب للمسئولين؟ أجاب: "روحنا لمجلس المدينة بالحامول ومحدش بيسأل فينا والله، والله رحنا كتير، انا نناشد السيد رئيس الجمهورية، ونناشد السيد المحافظ، ونناشد كل انسان في قلبه رحمه، مركز الحامول، طريق البشيقة الغربية من غير رصف وشكرا لكم".

ويقول الحاج محمد سلامة: "ازاي قرية زي دي وميكونش فيها اي خدمات حكومية، حرام والله احنا بنطالب بأقل حق من حقوقنا في المجتمع ده، عايزين الطرق تترصف، عايزين مدرسة في القرية، بدل ما ولادنا متشردين علي الطرق كل يوم".

اما الشاب علي خليل فيقول: "احنا عايزين المسئولين يعرفوا إن فيه قرية اسمها البشيقة، قرية زي اي قرية داخل مركز الحامول، لها حقوق زي اي قرية، مش معقول اللي احنا بنشوفه ده، والمسئولين محلك سر وكأن شيئآ لم يحدث".